Әни булып карадым                                   
Бүген шундый төш күрдем мин,
Курчагым тере икән.
Йөри, сөйләшә дә белә,
Нәкъ безнең кебек икән.

               Миңа әни диеп дәшә,
                Мин янәсе үскәнмен.
               Курчак минем кызым булган,
               Мин әнисе икәнмен.

Алъяпкычым бәйләп куйдым,
Пешердем тәмле ботка.
Калак тоттырдым курчакка,
Зур бит, дим, үзең аша.
                Калак тотып бер болгатты,
               Биш болгатты ботканы,
               Ашыйсым килми минем, дип,
                Кәҗәли үк башлады.
Җыеп куйдым кәнфитләрне,
Аппетит бозмаска дип.
Ничек инде иртән торып,
Ботка ашамаска, дим.
              Алай көйлим, болай көйлим,
             Кил, үзем ашатам, дим.
             Боткаңны ашап бетерсәң
            Мультфильм каратам, дим.
Бер калак та каптыралмыйм,
Суынып бетте ботка.
Мин пешергән тәмле ботка
Ник ошамый курчакка?
            Шулчак мине уяттылар,
             Минем әнием икән.
            Мин торуга нинди тәмле
                Әйбер пешерде микән?
...Тагын ботка, ничек кирәк
Шулай көчләп ашадым.
Төштә бүген үзем дә бит
Әни булып карадым.
                                                                  29.11.2005

                       Айга менәр идем дә...                         
Космонавт  булып минем
Килә Айга менәсем,
Көянтә, чиләк күтәргән
Зөһрә кызны күрәсем.
                Тик әнием җибәрмәс шул,
              Бик килсә дә менәсем.
               Айдан түгел, агачтан да,
             “ Төш, ди, кая менәсең?!”
Аннары соң, миннән башка
Монда калганнар нишләр?
Гәҗит укырга бабама
Күзлеген кемнәр эзләр?
                Әбиемә кирәк чакта
                Энәгә җеп кем саплар?
                Күрше кызын мин югында
                 Ата каздан кем яклар?
Әтием такта кискәндә
Такта башын кем тотар?
Мин йоклаган караватта
Мин югында кем йоклар?
                Айдан бик тиз төшеп булмас
                Мультфильм күрсәткәндә.
                 Мырауҗанны койрыгыннан
               Сеңлем тартып йөрткәндә.
Барсына да бер мин кирәк,
Минсез кыен аларга.
Шулай булгач туры килә
Монда гына калырга...
                                                                                    28.10.2000



                            Туп та арый күрәсең
Бер, ике, өч, дүрт,
Сикер әле тагын туп.
Ә мин санап торырмын,
Җиде, сигез, тугыз, ун.
                       Унөч, ундүрт, егерме,
                       Сикер, дип тагын берне
                       Бәрдем. Читкә сикерде,
                      Нәкъ чикерткә шикелле.
Тәгәрәде, йөгерде,
Кычытканлыкка керде.
Чагуыннан куркыр да,
Үрелмәс, диеп белде.
                      Кычытканлык тирәли
                     Таяк күтәреп йөрим.
                    Таяк җитми, кыскарак,
                       “Кил, дим, тупка, мондарак”.
Нигә анда керәсең?
Алалмасны беләсең.
Селкенми туп тик тора,
Сикереп арган күрәсең...
                                                               08.07.2002

Гармун нигә тыңламый?      

          
Әти – әни өйдә юкта,
Бер ялгызым калгачтын,
Алдым әтинең гармунын,
Матур көйләр сузмакчым.


              Телләренә кат – кат басып
              Тартам барлык көчемә.
               Әтинеке кебек матур
                Чыкмый никтер көй генә.


Сорамыйча алганымны
Гармун әллә беләме?
Бәлки шуңа күрә миннән
Яшергәндер көйләрне?


              Әтиемнең бармаклары
               Зур шул, шуңа тыңлыйдыр.
                Гармун әле мине һаман
                  Кечкенә, дип уйлыйдыр.


                                                            2005 ел.



                     Бака туе
Кич җиттеме, бакалар
Җырларга яраталар.
Җыелышып, үзләренчә
Туйлар ясап яталар.
                Яшел күлдә бакалар
               Баталар да, калкалар.
               Яр буенда унбиш бака
               Черки тотып яталар.
Менеп басып зур ташка
Такмак әйтә бер бака.
Чирәм өстендә тыпырдап
Бөтерелә ун бака.
               Берсен – берсе уздырып
                Бака хоры җыр суза.
               Бер бакасы ботын селкеп
             Дирижордай пыр туза.
Уң якка карасам да,
Карасам да сул якка,
 Озын ботларын күтәреп,
Кайда да бака ята.
                 Бакаларның туена
                 Кил әле күл буена.
                 Бергәләшеп бакаларны
                  Санарбыз төн буена.
                                                                                             17.05.2001

            Үпкәләмә әниеңә


Үпкәләмә әниеңә
Ул сине ачуланса.
Тыңламаган өчен сине
Почмакларга бастырса.

Ул сине бары тәртипле,
Яхшы бала булсын, ди.
Һәркем теләгән бәхетне
Эзләп таба алсын, ди.

Безне дә кайчак әниләр
Тиргәделәр, сүктеләр.
Яхшы, яманны аерып
Яшәргә өйрәттеләр.

Үпкәләмә әниеңә
Ул сине ачуланса.
Тыңла, ярат әниеңне,
Нишләрсең ул булмаса?


                                                            29.11.2005



              “ 2” леңне кире илт
Бер көн шулай икеле
Алып кайттым мәктәптән.
Икелемне күрделәр
Ачып карап дәфтәрдән.
                Әй, орышты әбием,
                Әй, орышты әнием.
             “Уйнарга да чыкмый бүген
                Укы!”- диде, әтием.
Сеңлем әле кечкенә,
Яше бары өч кенә.
Икеленең ни икәнен
Аңлый алмый һич кенә.
               Икелегә охшап шулай
             Торам үзем кызарып.
              Барысы да орышканга,
             Сеңлем ахры кызганып,
Чыгып басты уртага,
Тотынды да сумкама,
“Әйдә, абый, киттек,ди,
Кайтыйк кире илтеп”, ди.
                                                           18.05.2001

                        Әби бүген ипи салды

Әби бүген ипи салды,
Бер түгәрәк, өч шакмак.
Күпме янга акча калган,
Утырам шуны чутлап.

                     Әби бүген ипи салды,
                      Бер түгәрәк, өч шакмак.
                      Чутлап утырмас идем дә,
                      Акчаны бик чутлар чак.

Әби бүген ипи салды,
Бер түгәрәк, өч шакмак.
Шактый янга акча калган,
Дип куйдым, кесәм капшап.

                         Әби бүген ипи салды,
                          Бер түгәрәк, өч шакмак.
                          Бер түгәрәк, өч шакмакны
                          Көнен бетердек ашап...
                                                                            1997 ел